Bu il Himaçal-Pradeş güclü yağışlar səbəbindən geniş dağıntıların şahidi olub.
Hindistanın Himalay dağlarını sürüşməyə səbəb olan leysan yağışları bürüyüb.
Məlumata görə, hazırda təbii fəlakət nəticəsində ölənlərin sayı 50 nəfərə yaxındır. Onların arasında hindu məbədinin uçması zamanı ölən bir neçə nəfər də var.
Yerli hakimiyyət orqanlarının məlumatına görə, ölənlərin sayı arta bilər. Çünki 20-dən çox adamdan hələ ki, xəbər yoxdur. Hazırda axtarış-xilasetmə işləri aparılır.
Hadisə ilə əlaqədar Hindistanın avqustun 15-də qeyd etdiyi “Müstəqillik Günü” münasibətilə bütün mədəni tədbirlərin ləğvi barədə qərar qəbul edilib. Sakinlərə evdə qalmaq və sürüşmə baş verə biləcək yerlərə getməmək barədə çağırış edilib.
Təsirə məruz qalan ərazilərdə yağışın təxminən 55 saat davam etdiyi bildirilib.
