Almaniya və ABŞ-dan olan tədqiqatçılar qrupu koronavirusun biomühəndislik nəticəsində yarandığına dair sübutlar tapıb.
Bu barədə "n-tv" televiziya kanalına tədqiqatda iştirak edən Vürtsburq Universitet Xəstəxanasının alimi Valentin Bruttel deyib.
"Araşdırmamızın nəticələri göstərir ki, bu virus 99,9 faiz təbii virusun süni şəkildə yaradılmış surətidir", - deyə alim bildirib.
Onun sözlərinə görə, o, 2021-ci ilin yayında "Sars-CoV-2" genomunda anomaliyaları müşahidə edib və o vaxtdan onun mənşəyinin öyrənilməsində iştirak edib. Alim izah edib ki, onlar koronavirus genomunda sintetik viruslar üçün xarakterik olan spesifik nümunə tapıblar, təbii viruslarda isə bloklar təsadüfi şəkildə yayılıb.
Tədqiqatın nəticələrinə görə, SARSCoV-2 "yüksək ehtimalla "in vitro" şəklində toplanmış bir yoluxucu klon kimi yarana bilərdi".
