Azərbaycana "Lada Vesta" gələcək
11-07-2015, 12:14. Yazar: Fehrad
Rusiyanın avtomobil istehsalçısı "AvtoVAZ" Yekaterinburqda keçirilən "İnnoprom-2015" sənaye yarmarkasında özünün yeni "Lada Vesta" modelini təqdim edib. Xeberaz.az-ın rus mətbuatına istinadən yaydığı məlumata görə, yeni avtomobilin kütləvi istehsalına sentyabrda, satışına isə noyabrda başlanılacaq.
"AvtoVAZ"ın təmsilçisi Aleksandr Bredixinin sözlərinə görə, "Lada Vesta" bütün tələb və standartlara, o cümlədən təhlükəsizlik və ekologiya standartlarına uyğundur. Avtomobil Rusiya istehsalı olan komponentlərdən istifadə etməklə ərsəyə gətirilib və ilk növbədə daxili bazar üçün nəzərdə tutulub.
Avtomobilin klassik, komfort və lüks komplektasiyalarda buraxılması nəzərdə tutulub. Onun mühərrikinin gücü komplektasiyadan asılı olaraq 87-114 at gücündə olacaq. Maşının sürət qutusuna gəlincə isə, həm mexaniki, həm də avtomatik sürət qutusuna malik avtomobilin buraxılması planlaşdırılır.
Yeni model Rusiya ilə yanaşı, digər MDB ölkələri – Qazaxıstan, Ukrayna, Belarus, eləcə də Azərbaycan bazarına çıxarılacaq.
Geri dön