“Gücümüz hədəfə çatmağa imkan verir” - Valeriya Məmmədova
16-09-2017, 10:07. Yazar: Xeberaz
“Ölkə xaricində baş tutan təlim-məşq toplanışı müddətində 6-7 oyuna çıxdıq. İlk oyunlarda uduzurduq. Çünki həmin dövrə fiziki çalışmalar təsadüf edirdi. Komanda isə yenicə yığışmışdı. Lakin İtaliyada komandamız böyük oyun təcrübəsi toplamağa başladı”. Apasport.az saytının məlumatına görə, bunu Azərbaycan millisinin voleybolçusu Valeriya Məmmədova deyib.
Təcrübəli libero komandamızın Avro-2017-yə hazırlığını dəyərləndirib. O, Azərbaycan Voleybol Federasiyasının feysbuk səhifəsinə bildirib ki, komanda indi kifayət qədər forma yığıb: “İtaliya, Xorvatiya və Belarus yığmaları tezliklə Bakıya gələcəklər. Burda oyunlar keçiriləcək. Fikrimcə, Avropa çempionatında biz ən yüksək formada olacaq və maksimum nəticə üçün oynayacağıq. Qarşıdakı yoxlama oyunlarının bizdə yorğunluq yaradacağını düşünmürəm. Əksinə, bizə hazırlıq üçün oyunlar keçirmək lazımdı. Çünki məşq ayrı, oyun isə tam ayrıdı. Oyunlar keçirməklə özünü təkcə peşəkar səviyyədə yox, həm də fiziki və mənəvi cəhətdən hazırlayırsan. Yarış vaxtı isə meydanda ağılla hərəkət edirsən. Amma məşqlərdə bunlar görünmür”.
Məmmədova Almaniya, Polşa və Macarıstanla birgə yer aldığımız A qrupu barədə də fikirlərini açıqlayıb: “Məncə, çox yaxşı qrupa düşmüşük. Biz rəqiblərimizə qalib gələrək, qrup birincisi olmalıyıq. Gücümüz bu hədəfə çatmağa imkan verir. Növbəti mərhələyə lider kimi çıxmalıyıq. Hələ ki qrupdakı rəqiblərimizi təhlil etməmişik. Amma tədricən Qran-pri və başqa turnirlərdə çıxış edən rəqiblərin oyunlarıyla tanış oluruq. Bütün oyunçuları praktiki olaraq tanıyırıq. Bu üzdən hələlik bu istiqamətdə hazırlıq getməyib. Hazırda öz səhvlərimizi analiz edirik. Çempionat ərəfəsində qrupdakı rəqiblərimizlə tanış olacağıq. Hələlik formamızın pik həddində olduğumuzu deməzdim. Xorvatiya və İtaliya da hələ ki forma yığır. Optimal formaya düşmək üçün çalışırıq. Avropa çempionatında medal qazanacağımıza inanıram”.
Geri dön