Xanımı transferə işarə vurdu: “Monako”dan “Mançester Yunayted”ə doğru
13-06-2017, 18:40. Yazar: Xeberaz
Transfer çalışmalarını davam etdirən “Mançester Yunayted” daha bir oyunçunu heyətinə qatmağa hazırlaşır. apasport.az saytının Britaniya mətbuatına istinadən məlumatına görə, “qırmızı şeytanlar” bu dəfə “Monako”nun yarımmüdafiəçisi Fabinyonun transferinə çox yaxındı.
“Benfika”nın mərkəz müdafiəçisi Viktor Lindelöfün razılığını alan “mankunianlar”da baş məşqçi Joze Mourinyo braziliyalını da sərəncamında görməkdə israrlıdı. Hələ ötən ildən “Mançester Yunayted”in gündəmində olan Fabinyo ilə danışıqlar müsbət məcrada davam edir.
Ötən mövsümün gedişində “Monako” ilə yeni müqavilə imzalayan 24 yaşlı futbolçu hələ o vaxt gələcəkdə “Mançester Yunayted”ə keçmək arzusunda olduğunu etiraf etmişdi. İngilislər bu keçid üçün qarşı tərəfə 40 milyon funt-sterlinq təklif ediblər.
Braziliya millisinin üzvünün həyat yoldaşı Rebeka Tavaresin son hərəkəti də bu keçidin baş tutacağından xəbər verir. Belə ki, azarkeşlərdən biri instaqram vasitəsilə ona “Xahiş edirəm, “Mançester Yunayted”ə gəlin” mesajını yazıb. Buna “bəyənmə” işarəsini vuran Tavares həyat yoldaşının bu yolda olduğunu əlavə etməklə ingilisləri həyəcanlandırıb.
Qeyd edək ki, müdafiənin sağında və dayaq yarımmüdafiəçisi mövqeyində oynamağı bacaran Fabinyo “Monako”ya 2013-cü ildə “Rio Ave”dən keçib.
Geri dön