“Gecələr qorxudan yata bilmirəm” - Torpaq sürüşməsi sakinləri narahat edir - FOTO
26-10-2016, 19:31. Yazar: Xeberaz
İsmayıllıda ard-arda baş verən sürüşmələri əhali arasında təşviş yaradıb.
ARB Şəki xəbər verir ki, İstisu kəndində dağın yamacında yerləşən torpaq uçqunları nəticəsində təsərrüfat sahələrinə ziyan dəysə də, yaşayış evlərində hələlik təhlükəli vəziyyət qeydə alınmayıb.
Kənd sakinləri isə yağıntının davam edəcəyi təqdirdə yarana biləcək təhlükədən narahatlıq keçirirlər.
Kənd sakini: "Mən gecələr evdə qorxudan yata bilmirəm. Bir taqqıltı olan kimi, qaçıram ki, görəsən, torpaq gəlir, yoxsa gəlmir".
Kənd sakini: "Düzdür, hələ ki, bizə ziyan dəyməyib. Hələ ki, təhlükə yoxdur. Amma görünür ki, olacaq".
İsmayıllı rayon FHK-dan verilən məlumata görə, artıq yağışların kəsməsi səbəbindən sürüşmənin aktivliyi dayanıb. Lakin yağıntılar davam edərsə, sürüşmənin yenidən aktivləşəcəyi ehtimal olunur. İstisu kəndinin sürüşmə zonasına Geoloji Planlama Ekspedisiyası yenidən baxış keçirib. Sürüşmənin dinamikası, dəyə biləcək ziyan, qabaqlayıcı tədbirlər və s. haqda müvafiq qurumları məlumatlandırmaq üçün araşdırmalar aparılır.
Geri dön