Naxçıvan Muxtar Respublikası
9 - 14°
- 5 - 10°
Qazax, Gəncə, Goranboy, Tər-Tər, Ağdam, Füzuli, Cəbrayıl
9 - 14°
0 - 5°
Mərkəzi-Aran
9 - 4
0 - 5
Masallı, Yardımlı, Lerik, Lənkəran, Astara
7-11°
0-3°
Bakıda və Abşeron yarımadasında
8-10°
2-4°
Oftalmoloqdan valideynlərə MÜRACİƏT: “Şəkillərdə uşaqların gözünə diqqətlə baxın”
Tarix: 21-02-2017 | Saat: 14:21
Bölmə:Karusel / Səhiyyə / M2 | çapa göndər

Oftalmoloqdan valideynlərə MÜRACİƏT: “Şəkillərdə uşaqların gözünə diqqətlə baxın”


"Bir sıra göz xəstəlikləri var ki, bunlar körpə uşaqlarda anadangəlmə və yaxud qazanılmış korluğa səbəb ola bilər. Əgər körpə valideynin hərəkətlərini izləmirsə, bu, artıq korluğun göstəricisidir. Belə hallarda erkən müdaxilə vacibdir. Vaxtından əvvəl doğulmuş körpələrin isə hər bir halda ilk ayında göz dibi müayinəsindən keçmələri şərtdir".
Bunu Respublika Müalicəvi Diaqnostika Mərkəzinin göz cərrahı, tibb elmləri doktoru Tural Qəlbinur Azərtac-a müsahibəsində bildirib.

T.Qəlbinur deyib ki, körpələrdə müşahidə edilən göz xəstəliklərindən biri də kataraktadır: “Kataraktanın - mirvari suyunun ilkin simptomları adətən göz bəbəyinin tam ortasında əmələ gələn ağ ləkədir. Əksər hallarda bu ləkə uşaqların çəkilmiş şəkillərində daha yaxşı görünür. Bu xəstəlik doğulan gündən etibarən cərrahi əməliyyatla aradan qaldırıla bilər”.

Həkimin sözlərinə görə, erkən, yəni 32 həftədən tez doğulmuş, yaxud çəkisi 1500 qramdan az olan körpələrdə ROP (erkən doğulanların retinopatiyası) xəstəliyi də müşahidə edilir: “Son illər ölkəmizdə bu xəstəlikdən əziyyət çəkən uşaqların sayı artmaqdadır. Əvvəllər 600-700 qram çəkidə doğulanların sağ qalma ehtimalı çox az idisə, hazırda tibbin inkişafı ilə belə uşaqlar həyatda qalır. Bu körpələr küvez aparatında xüsusi oksigen şəraitdə bir ay saxlanılırlar ki, bu da onların gözlərində ciddi problemlərlə nəticələnə bilər. Vaxtında müdaxilə edilmədikdə belə problemlər korluğa gətirib çıxara bilər. ROP xəstəliyinin simptomları çox gec özünü büruzə verir və üç ayına qədər müdaxilə olunmalıdır”.

Körpələrdə korluğa səbəb olan ən əsas amilin onun vaxtından əvvəl doğulması olduğunu vurğulayan T.Qəlbinur deyib ki, bu hal göz həkimi müayinəsinin vacibliyini önə çıxarır: “Gecikmiş halda gətirilən körpələrə müdaxilə etmək çox vaxt səmərəsiz olur. Belə ki, torlu qişanın qopması əmələ gəlirsə, artıq bu, dönülməz korluqla nəticələnir. Biz bu xəstəliyin inkişaf etmiş mərhələlərində də əməliyyat edirik. Təəssüflə qeyd etmək istərdim ki, cərrahi müdaxiləyə baxmayaraq, bütün körpələrə kömək etmək mümkün olmur. İlkin diaqnoz qoyulduqda lazer koaqulyasiyası və yaxud gözdaxili inyeksiyalar vasitəsilə bu problemin qarşısını almaq mümkündür”.

“Anadangəlmə korluğa genetik xəstəliklər də səbəb ola bilər. Xüsusilə birinci dərəcəli qohum evlilikləri nəticəsində doğulan körpələrdə bir sıra xəstəliklərlə yanaşı, ciddi göz problemləri də müşahidə edilir. Belə uşaqlarda müxtəlif göz dibi, torlu qişa patologiyaları yaranır ki, bu da göz problemlərinin əmələ gəlməsində vacib faktorlardan biridir. Uşaqlarda anadangəlmə müxtəlif retinoblastomalar və rabdomiosarkomalara (bədxassəli şişlər) da rast gəlinir. Müasir tibdə bu tip xəstəliklərdə bəzən gözü xaric etmədən də müdaxilə etmək mümkündür”, - deyə həkim əlavə edib.

Qazanılmış göz problemlərinə gəldikdə isə, burada çəpgözlüyü misal çəkmək olar. Bu halda göz həkiminə kiçik yaşlarda müraciət edilməlidir: “Çəpgözlük adətən eynəklə müalicə olunur. Eynək taxma dövrü çəpliyin növündən asılı olaraq dəyişir. Lakin bu üsul kömək etmədikdə qüsur cərrahi müdaxilə ilə aradan qaldırıla bilər. Belə olan halda cərrahi müdaxilə məktəbəqədər dövrdə edilməlidir.
Zədələr nəticəsində əmələ gələn korluqlarda isə alınan zərbənin dərəcəsi, küt və ya dəlici olması əsas rol oynayır. Bəzən küt zədələr dəlicilərdən daha şiddətli ola bilir. Belə zərbələrin dalğaları bütün toxumaları zədələyir. Korluq ümumiyyətlə, görmə sinirin zədələnməsi və yaxud torlu qişanın qopmasına bağlıdır. Torlu qişanın qopması varsa və yaxud mirvari suyu əmələ gəlibsə, biz buna cərrahiyyə ilə müdaxilə edə bilirik. Lakin hər hansı bir görmə sinirinin zədələnməsi halında çox təəssüf ki, heç bir müalicə metodu kömək etmir. Bugünkü tibdə görmə sinirinin bərpası mümkün deyil”.



4548 dəfə oxunub.

Digər xəbərlər
bütün xəbərlər
____ Instagram ___