Ana Sayfa > Bütün xəbərlər / Karusel / Siyasət / Gündəm / Hadisə / Təhsil > Ata-oğul Məhərrəmovların “kitabını” bağlayan səbəblər - İLGİNC İDDİA

Ata-oğul Məhərrəmovların “kitabını” bağlayan səbəblər - İLGİNC İDDİA


25-04-2021, 13:37. Yazar: Xeberaz
Bakı Dövlət Universitetinin sabiq rektoru Abel Məhərrəmovun oğlu Anar Məhərrəmovun vəzifəsindən uzaqlaşdırılması ilə bağlı müzakirələr səngimir. Azərbaycan Respublikasının İspaniya Krallığında və Andorra Knyazlığında fövqəladə və səlahiyyətli səfiri, eyni zamanda, Ümumdünya Turizm Təşkilatı yanında daimi nümayəndəsi olmuş Anar Məhərrəmovun atasının güdazına getdiyi iddiası var.
Abel Məhərrəmov oğlunun geri çağırılmasından sonra açıqlamasında onun işsiz qalmayacağına ümid etdiyini açıqlayıb. Lakin onun ümidlərinin doğrulmayacağı xəbəri də var. Qeyd olunur ki, Abel Məhərrəmovun 2 ilin ərzində 2 ciddi “çp”si onunla bağlı “yuxarılarda” çox ciddi inamsızlıq yaradıb. Onun adı rektor olduğu dövrdə daha çox İspaniyada səfir olan oğlu Anar Məhərrəmovun işləri ilə bağlı çəkilirdi. İspaniya sahilləri yaxınlığında qəzaya uğrayan Türkiyə gəmisində olan Azərbaycan vətəndaşı, 52 yaşlı Sadiq Tağıyevin ailəsi səfirin fəaliyyətsizliyindən, vətəndaşa laqeyd münasibətindən şikayət etmişdi. Bu haqda mətbuat yazandan sonra Abel Məhərrəmov Xarici İşlər Nazirliyinə gedib oğlu haqqında şikayətlərə görə narazılığını bildirmişdi. Hətta oğlundan şikayətçi olanların cəzalandırılmasını belə tələb etmişdi.

O günlərdə səfir Anar Məhərrəmovun İspaniyada şərab biznesiylə məşğul olması, hətta Madriddən Bakıya konkret restoranlara şərablar göndərilməsi barədə məlumatlar yayılmışdı. İspaniyadakı azərbaycanlıların Sadiq Tağıyevlə bağlı XİN-ə ünvanladıqları şikayət məktubunda da bu məsələyə toxunulmuşdu. Abel Məhərrəmov oğlunun fəaliyyətilə bağlı şikayətlərdən danışarkən şərab biznesi haqda bildirmişdi ki, İspaniyadan şərablar restoranlara deyil, konkret şəxslər üçün göndərilir və bundan hamının da xəbəri var.

İşdən çıxarılandan 1 həftə əvvəl, 2018-ci il noyabrın 3-də Abel Məhərrəmov biabırçı qalmaqalın mərkəzi fiquruna çevrildi. Belə ki, Allahşükür Paşazadə başda olmaqla geniş tərkibli Azərbaycan nümayəndə heyəti xüsusi reyslə İspaniyanın paytaxtı Madrid şəhərinə səfərə çıxıb. “Airbus-319 A” təyyarəsi ilə uçmağa hazırlaşan təyyarə 2 saata qədər havaya qalxa bilməyib. Buna səbəb isə nümayəndə heyətinin tərkibində yer alan BDU-nun rektoru Abel Məhərrəmovun 2 tonluq baqajı olub. Səfər iştirakçıları noyabrın 10-da Madriddən qayıdanda da eyni hadisə ilə üzləşməyə məcbur olublar. Yalnız Məhərrrəmova və onun ölkəmizin İspaniya Krallığındakı səfir işləyən oğluna məxsus 2 tona qədər yük boşaldıldıqdan sonra təyyarənin uçuşuna icazə verilib. Həmin yük onun səfir oğlunun şərab biznesinə aid çəlləklər olub.

Şərab dolu çəlləklər kontrabanda yolu ilə Azərbaycandan İspaniyaya aparılır və orada şüşələrə doldurularaq qeyri-qanuni şəkildə geri qaytarılır. Sonra isə ispan şərabı adı ilə Məhərrəmova məxsus şadlıq evlərində, restoranlarda və digər ticarət nöqtələrində satılır. Həmçinin o, səfər zamanı “Eurostar Madrid” otelinin restoranında millət vəkillərindən biri ilə yeyib-içdiyi vaxt dava salıb. Yalnız ispan polisi işə qarışdıqdan sonra dava-dalaş dayanıb.

Səfər iştirakçılarından birinin dediyinə görə, o gecənin səhəri tədbirin keçirildiyi salonda da utandırıcı anlar yaşanıb. Axşamkı kef məclisindən sonra özünə gələ bilməyən Abel Məhərrəmov olduqca yayğın olub, məntiqsiz və rabitəsiz sözlər səsləndirib. Orada olan yerli və xarici jurnalistlər, həmin gecə baş verənlərdən xəbərdar olan konfrans iştirakçıları öz aralarında pıçıldaşaraq, onun hələ də ayılmadığını deyiblər. Bu olaydan sonra Abel Məhərrəmov tutduğu vəzifədən azad olundu.

Onun adı növbəti dəfə xüsusi karantin dövründə toy məclisinə qatılması ilə gündəmə gəldi. 2020-ci ilin avqustunda Abel Məhərrəmov Ramiz Mehdiyevin qız nəvəsinin toy məclisinə qatıldı, sabiq aparat rəhbərinin şəninə siyasi tost səsləndirdi. Bu saymazyana davranışın onun və oğlunun karyerasında bir şəkildə özünü göstərəcəyinə şübhə yeri qoymurdu.

Bu ilin martında keçirilən YAP-ın qurultayında Abel Məhərrəmov İdarə Heyətindən kənar saxlanıldı, adı “vurulmuş”lar siyahısında ilk yerlərdə çəkilirdi. 1 ay çəkməmiş oğlunu da yola saldılar. Gedişat onu deməyə əsas verir ki, Məhərəmovların vəzifə pillələrinə qapıları qapanıb.
“Yeni Müsavat”

Geri dön