Azərbaycan NASA strukturları ilə sıx əlaqələr qurub

"Azərbaycan ABŞ-ın Milli Aeronavtika və Kosmos Agentliyinin (NASA) strukturları ilə sıx elmi əlaqələr qurub və bu əlaqələri daha da möhkəmləndirmək niyyətindədir".

 "Xabar.az " xəbər verir ki, bunu Azərbaycan Respublikasının Prezidenti yanında Elmin İnkişafı Fondunun icraçı direktoru Elçin Babayev deyib.

E.Babayevin sözlərinə görə, bu məqsədlə gənc kadrların elmi potensialının istifadə olunması üçün yüksəs səviyyəli treninqlərdə iştirakı nəzərdə tutulur:

"Bu, onlara öz elmi tədqiqatlarını beynəlxalq səviyyədə aparmağa imkan verəcək. Bunun üçün uyğun məkan Kosmik hava üzrə beynəlxalq təşəbbüsün Kosmik Hava Məktəbi ola bilər. Bu məktəbdə gənc mütəxəssislər sıx əlaqələr qura bilər, bu isə mədəniyyətlərarası dialoqun və ölkənin elmi potensialının inkişafına xidmət edəcək".

Fondun icraçı direktoru hesab edir ki, qlobal naviqasiya və peyk sistemlərində problemlər aktuallığını saxlayır. Son 10 il ərzində alimlər günəş və geomaqnit fəallığının bioloji və texnoloji sistemlərə təsirini tədqiq edir:

"Bu gün Azərbaycan kosmik klubun üzvüdür və Kosmik Hava Məktəbi bizim üçün xüsusi əhəmiyyət kəsb edir. Bu məktəbdə Şamaxı Rəsədxanasının, "Azərkosmos" ASC-nin, Milli Aviasiya Akademiyasının, eləcə Nəqliyyat, Rabitə və Yüksək Texnologiyalar Nazirliyinin mütəxəssisləri təhsil alır".