Türkiyə, Rusiya və İran liderlərinin bir araya gələcəyi əhəmiyyətli zirvəyə bir neçə saat qalmış Suriya prezidenti Bəşər Əsədin də Soçiyə səfər etdiyi açıqlanıb.
Kreml, Bəşər Əsədin Rusiya lideri Vladimir Putinlə görüşünü bir gün sonra açıqlayıb.
Kremlin məlumatına görə, Putin Əsədi İŞİD terror təşkilatına qarşı mübarizədəki müvəffəqiyyətinə görə təbrik edib. Rusiyanın təşkil etməyə hazırlaşdığı Suriya konqresinin müzakirəsi zamanı Putin, “Astana sülh prosesi əhəmiyyətli addımdır” deyib.
Rusiyaya təşəkkür edən Əsəd isə, Suriyadakı məsələnin siyasi həllini istəyən hər kəslə müzakirə aparmağa hazır olduğunu açıqlayıb.
Qeyd edək ki, Türkiyə, Rusiya və İran, vətəndaş müharibəsinin az qala yeddinci ilini bitirəcəyi Suriyada atəşkəs bölgələri elan edib və ölkə səviyyəsində silahlar susub. Üç ölkə, müxalifətin nəzarətindəki ən böyük əyalət olan İdlibə müşahidəçi qoşun göndərməyə hazırlaşır. Türk ordusu oktyabr ayından etibarən İdlibdə araşdırma aparır.